Nieuws

Welkom op de website van Karnevalsvereiniging "De LouverMEN oet Buchte"

Prins Frank I en Prinses Silvia

Proclamatie veur de vastelaovend in ‘t jaor 2012

Biê de grasie van de Wiêze Raod, gebaore es rasechte Louverman, samewonend mit ’n maedje oet de Waereldsjtad, höb ich, Frank Segers, de eër òm in ´t jaor 2012 mit de vastelaovend te maoge regere euver ‘t Louverriêk Buchte. Mit de goodkööring en volledige òngersjteuning van miên Prinses Silvia belaof ich biê deze plechtig alles te doon, wat van eine gooje Prins maog waere verwach en proclameer ich, in het biêzeen van uch allemaol, es Prins Frank I van ’t Louverriêk Buchte, de volgende puntje:

Ten eërste:

Det “Achter de hegge” nao ein tiêdje, weer ein prinsepaar haet veurtgebrach. Ondanks det d’r gein buurtvereiniging mae aktief is, maoge de luuj oet dit deil van Buchte toch de keuninklikke tietel drage. Om dae tielel meër cachet te gaeve, roop ich alle luuj oet de buurt op de ganse vastelaovend de vlag van de Louvermen boete te hange.

Ten tweëde:

Det ich de Sjöttekepèl mit ingangk van vanaovend oêtroop tot ôzze persuënlikke hofkepèl. Ondanks det zie ‘t dit jaor zonger ozze onnavolgbare muzikale kwaliteite motte doon, höbbe veer d’r ’t volste vertrouwe in det de leje deze tietel veur de volle 100% zulle waormake. Ich verwach det ze euveral aan zulle mitdoon op ‘n meneer, die biê ‘n hofkepèl pas.

Ten driêde:

Det ich ès sjatbewaarder van de sjötte de kommende waeke, nao verwachting, get minder tied kèn sjpendere aan de cash-flow van de sjötterie. Alle oetgave onger de € 11,11 kenne dan ouch bie deze zonger mien goodkööring weare oetbetaald. Graotere oetgaves zulle effe motte wachte tot nao èsselegoonsdig.

Ten veerde:

Det ich d’r-op raeken det miêne werkgaever, Scania, mit ’t hoofkentaor in Breda, dus eigelik mit die daag “Scania Kielegat” geneump, d’r veur zörg det de optoch in Buchte ekstra wurd opgepimp. Ich zal hööm dan ouch vraoge d’r veur te zörge dat dit jaor ozze prinsewage wurd getrokke door eine echte road-gael-greune Scania vrachwage.

Ten viefde:

Det mien leef Prinses Silvia, ès profesjoneel dialekvertaalster, höör zörg haet oetgesjpraoke euver de gebroekte taal oppe website van de Louvermen. Alle berichte sjtaon namelik in ’t Holles! In de sjpaarzame laege tied zal zie, same mit de webmaster van de sait, zörg drage veur eine flinke vertaalsjlaag nao ’t ABP, ‘t Algemein Buchtens Plat.

Ten zösde:

Det noe Prinses Silvia en ich zeen oetgerope tot Prinsepaar van ’t Louverriêk, d’r neet ein, maer zellufs twae leje van de fanfaar mit de vastelaovend de scepter zwèjje. Houpelik is dit veur de euverige leje van de fanfaar eine sjtimulans, om zich sjpesjaal dit jaor bie-ein te pakke en mit te doon aan de optoch in os muzikale Louverriêk.

Ten zevende:

Det noe ich ben toegetraoje tot de Royalty’s van ’t Louverriêk, ich d’r vanoet gaon det d’r oppe eëretribuun van ’t ZLF, ein sjaon plaats wurd gereserveerd veur mich en mien Prinses Silvia. Veer zulle ’t defilé van jedere sjötterie dan aafnumme mit eine krachtige driewerf “Louvermen, alaaf!”

Ten achste:

Det ich jederein oproop om nao de prinsereceptie te komme op zunjig 29 jannewarie vanaaf 11.11 oêr. Allereërs omdet veer ’t zellef heël sjiek vènje es geer allemaol zouwt komme. Maer ouch veur ’t nuuje Jeugprinsepaar det volgende waek wurd oetgerope.

Ten neugende:

Det ich alle Louvermenkes en Louverwiêfkes vraog òm veural te bliêve deilnumme aan de versjillende vastelaovesaktievieteite in ‘t Louverriêk. Zwa höb ich zellef es jungske altiêd mit vööl plezeer mitgedaon aan ‘t Klonebal. Ich daag alle jonge Louvermenkes en –wiêfkes dan ouch oêt òm dit jaor ‘t stjekske van mich euver te numme en massaal in de geis van ’t thema “Sjoonste kloon in ein awt jeske” aan deze gezellige aovend mit te doon. Degene, dae ’t thema ’t sjaonste wèt oêt te beelde, wurd door mich persuënlik in ’t vastelaoveszunke gezat.

Ten tieënde:

Det veer in ‘t Louverriêk al einige jaore kenne genete van de Mini-Maxi-pleebéksjoo op vastelaovesdeensdig, wòaan door vööl jònge en get awwere Louvermenkes en -wiêfkes wurd mitgedaon. Òm det ouch dit jaor weer ‘n groat sukses te laote waere, nuëdige w’r uch oêt òm aan dees sjoo mit te doon of minstes te kòmme kiêke. Veer zulle d’r veur zörge det de Raod van Èllef weer ‘n swingende ekt verzörg biê dees Mini-Maxi pleebéksjoo.

Ten ellefde:

Mit uch allemaol wille weer vastelaovend viere, handj in handj,

same trèkke door òs sjaone Louverlandj.

Vastelaovend, 't feës veur jòngk en awt, groat en klein,

doot allemaol mit, maak sjpas en plezeer, mit jeederein.

Kepèlle, hauwt op die kis en gaot veur òs oêt,

mit ‘n trööt oppe nak of ‘n tròm òm de boêk.

Vastelaovend is weer dao, de kop is d’r vanaaf,

neemes hilt òs noê meër taege,

Louvermen, Alaaf, Alaaf, Alaaf.

Aldus opgemaak te Buchte, de 14e jannewarie 2012

Prins Frank I, Prinses Silvia, Vors Jeroen en de Wiêze Raod

Jeugdprins Vince I en Jeugdprinses Kiki

Beste Louvermenkes & Louverwiêfkes,

Op veursjpraok van Jong Nederland en mit de goodkeuring van karnevalsvereiniging ‘De Louvermen’ en de sjteun van ’t nuut Prinsepaar Prins Frank de 1ste en Prinses Silvia zeen weer oêtgeroope tot ‘t nuujt jeugprinsepaar van ‘t Louverriêk.

W’r wille òs aeve veursjtèlle:

Ich bèn Prins Vince I,

en ich bèn Prinses Kiki.

Weer zulle dit jaor, same mit Prins Frank de 1ste en Prinses Silvia, d’r veur zörge, det weer eine super te gekke vastelaovend in 't Louverriêk gaon belaeve. Eine vastelaovend wò weer allemaol nog lang en mit vööl plezeer aan zulle trök dènke. Biê deze wille weer dan auch oos puntje proklamere:

Ten eërste:

Det weer ooze veurgengers prins Glenn de 1ste en prinses Britt wille bedanke veur de geweldige meneer, wò-op ze veurig jaor es jeugprinsepaar de vastelaoveskar veur de jeug höbbe getrokke. Harsjtikke good van ze.

Ten tweëde:

Det òs prinselik pelies mit de vastelaovend natuurlik road, gael en greun is gekleurd en det alle hoeze in de buurt de vastelaovesvlag boête höbbe hange.

Ten derde:

Det Prins Frank neet mòt dènke det hae ’t noê allein veur ’t zègke haet in ‘t Louverriêk, Kiki en ich sjpraeke auch nog ’n weurdje mit.

Ten veerde:

Det ich miên mam aanwies es miên persuenlikke kapster en det zie mich sjteeds de haore op ein prachtige meneer duit verzörge, zowie det biê ein echte prinses huërt.

Ten viêfde:

Det ’t òs es jeugprinsepaar is toegesjtange òm ooze eige bedtied te bepale en ich ken uch zègke det dae erg laat zal zeen. En natuurlik wille w’r sjmòrges oêtsjlaope.

Ten zösde:

Det ooze awwers neet mòtte zeure es weer mit die daag èns ein glaeske cola te vööl op höbbe., mer det ze mòtte zörge det t’r genòg chips en frisj in hoes is.

Ten zevende:

Det de groate luuj van buurt Het Anker zich bie-ein mòtte pakke en d’r veur zörge det de buurtvereiniging weer nuut laeve krig ingeblaoze en det ze dan auch weer mit gaon doon aan ooze vastelaovesoptoch.

Ten achste:

Det ich miên ganse femilie opdraag òm same mit mich, verkleid en waal, vastelaovend te viere in òs prachtige Louverriêk.

Ten neugende:

Det ich de Gemeinte oproop òm de sjtoeptegels èns good te controleere, want die ligke behuërlik hobbelig, wò door mit skeete en weefborde de tenj ôet ooze mondj rammele.

Ten teënde:

Det meister John en juffrouw Cindy òs mit dees daag neet lestig mòtte valle mit allerlei lesse en det de pauzes get langer kènne doere, zoadet w’r in polonaise euver de sjpeelplaats kènne laupe.

Ten èllefde:

Det weer ’t zeker leuk zouwe vènje es de awwers van òs en auch Prins Frank en Prinses Silvia mitdoon aan die pleebeksjoo en es beloning daoveur haole weer die dan ‘n glaas beer.

W'r besjloête mit òs motto:

“weer wunsje uch allemaol vööl sjpas en kleur,

want deze vastelaovend gaon weer d’r veur

Alaaf, Alaaf, Alaaf.

Buchte, 20 jannewarie 2012

Jeugdprins Vince 1 & Jeugdprinses Kiki